انا اسمى ريهام

كاملة

انا اسمي (ريهام)  عايشين انا واهلي  في  منطقه نزله السمان في الهرم .. دي منطقه سياحيه كلها سياح وبازارات وناس من كل بلاد العالم جايين يشوفو الاثار.. واحنا متعودين اننا نسترزق من السياح يعني شغل المنطقه كله معتمد عليهم
ولما كبرت بقي عندي ٢١سنه اتجوزت ابن جيراننا.. (حسن )وكنا علي اد حالنا لسه امكانيات جوزي ضعيفه ..  في بدايه الجواز كنت عايشه مع حمايا وحماتي  في نفس الشقه.. وحسن كان بيشتغل مع السياح وانا قاعده في البيت وعدت اول سنه جواز محصلش حمل وبدانا رحله العلاج وكل الدكاتره قالو ان انا وجوزي مفيش عندنا حاجه تمنع الحمل وان الموضوع مساله وقت.. وفعلا بعد تاني سنه جواز ربنا رزقنا ببنتي (نسمه) اول فرحتي والنور الي بينور لي حياتي.. كانت من صغرها جميله جدا وملفته .. مفيش حد يشوفها الا ويلاحظ جمالها.. كل الناس في منطقتنا عرفو نسمه وجمالها .. ومش بس جميله لكن بتخش القلب علي طول بشوشه ولها ضحكه ساحره

بعد ما كملت نسمه خمس سنين قررت اجيب لها اخ او اخت.. وفعلا حملت تاني بس المفاجاه اني المره دي جبت بنتين توام وبقي عندي تلات بنات
وعدت السنين واحنا عايشين حياه عاديه وحمايا وحماتي ناس علي اد حالهم وجوزي يادوب مكفي مصاريفنا
ولما نسمه بنتي بقي عندها ١٢سنه حماتي ماټت وحمايا زعل عليها جدا ومكملش تلات شهور بعد حماتي وماټ هو كمان من حزنه علي مراته 
جوزي كان كويس معايا جدا رغم اننا اتجوزنا جواز صالونات لكن مع العشره الطيبه بقينا بنحب بعض جدا 
وفي يوم جه راجل فتح مطعم علي الطراز الفرعوني وعمل فيه ديكور ونظام انه يقدم اكل مصري فلاحي فطير مشلتت وعسل و ملوخيه وحمام وبط يعني الاكلات المصريه المشهوره.. جوزي. راح له وطلب منه يشتغل معاه في المطعم وفعلا وافق وشغله معاه بمرتب كويس.. وقتها طلبت منه يكلمه يشعلني معاه في المطبخ انا شاطره في الاكلات  المصريه دي.. وفعلا الراجل وافق يشغلني انا كمان..  وفي الايام اليبيكون الشغل فيها كتير كانو بناتي بيساعدوني بعد ميرجعو من المدرسه.. نسمه كانت دايما تطلع من الاوائل.. وانا وجوزي كونا فرحانين بيها جدا ومتوقعين انها تدخل كليه مرموقه وتكمل دراستها  علشان متطلعش زينا بتشتغل عند الناس
نسمه كانت كل مبتكبر بتحلو .. واول ما تمت ١٥سنه بدا يجي لها عرسان كتير بس طبعا احنا كونا بنرفض علشان مش عايزين حاجه تعطلها عن دراستها .. احنا عايزينها تتخرج وتشتغل وتبقي لها مركز محترم وتعيش حياه افضل من حياتنا انا وابوها .. احنا بدانا حياتنا من الصفر لكن دلوقتي الزمن غير الزمن مش عايزين بنتنا تتعب وتتجوز اي جوازه والسلام
حياتنا كانت ماشيه تمام وبنحمد ربنا علي القليل وعلي الكتير ونسمه بنتي وصلت لتانيه ثانوي ومتفوقه خلاص باقي لها سنه وتدخل الجامعه 
وفي يوم جه عندنا في المطعم راجل خليخي باين عليه الغني ومعاه واحد مصري مش،من منطقتنا شغال معاه مرشد سياحي يفرجه علي البلد..فضل يجي المطعم عندنا كل يوم لمده اسبوع .. وبصراحه كان سخي جدا معانا وكل ميدوق اكله وتعجبه كان بيسيب لنا تبس كبير جدا .. وبصراحه كنا مبسوطين الكام يوم دول بوجوده.. وكان خلاص اخر يوم له وهيسافر .. في اليوم ده نسمه بنتي جات تساعدني في المطعم وشافها الراجل الخليجي. اول مشافها مشالش عينه من عليها.. انا مخدتش في بالي لانه كبير عنها مش عجوز لكن كبير اكبر مني ومن جوزي.. شويه ولقيت الراجل المصري الي معاه جاي بيسالني فين ابو بنتك ؟ انا عايز اتكلم معاه... قولت له خير حصل حاجه؟.. قال لي لا مفيش حاجه ان شاء الله كل خير
جوزي كان في مشوار ... استنوه لما رجع وقعدو يتكلمو معاه.. وبعد  شويه لقيت جوزي جاي بيقول لي ان الراجل الخليجي  معجب بنسمه وعايز يتجوزها.. رديت عليه بسرعه وقولت له طبعا لا انا مش عايزه اجوز بنتي دلوقتي حتي لو كان العريس مين .. لازم تكمل تعليمها  .. وعلي كل حال ناخد راي نسمه ونشوف.. وفعلا اتكلمت مع نسمه وحكيت لها الموضوع وبعد مخلصت كلامي قالت الي